ಬಿನ್ನಪವ ಸಲ್ಲಿಸುವೆನು/ ಎನ್ನೊಡೆಯ ನಿನಗಿನ್ನು /

ಇದೊಂದು ಹಳೆಯ ಭಕ್ತಿ ಗೀತೆ, ನಮ್ಮ ತಾಯಿಯವರು ಹೇಳುತ್ತಿದ್ದರು ಹಾಗೂ ನಮಗೂ ಹೇಳಿಕೊಟ್ಟಿದ್ದರು. ಇದು ಬಾಗೇಶ್ರೀ ರಾಗದಲ್ಲಿದೆ. ಬಹಳ ಸುಮಧುರವಾಗಿದ್ದು ಕೇಳಲು ಸುಶ್ರಾವ್ಯ ವಾಗಿದೆ.  ಹಾಡಿನ ಸಾಹಿತ್ಯ ಹೀಗಿದೆ.
ಬಿನ್ನಪವ ಸಲ್ಲಿಸುವೆನು/ ಎನ್ನೊಡೆಯ ನಿನಗಿನ್ನು /
ಭಿನ್ನತೆಯಲಡಗಿರ್ಪ/ ಭಿನ್ನತೆಯ ನಳಿಸೆಂದು /ಪ /

ನೀನೆ ಸೃಷ್ಟಿಸಿಹ ಜಗದಿ/ ನಾನೊಂದು ಕ್ರಿಮಿ ದೇವ/
ನೀನೆ ದಯದಿಂ ನೋಡಿ/ ಜ್ಞಾನವನು ನೀಡೆಂದು/೧/

ಅಂಧನಾಗುತೆ ಜಗದಿ/ ಬಂಧನದಿ ಸಿಲುಕಿರ್ಪೆ /
ತಂದೆಯೇ ದಯಗೈಯ್ದು / ಬಂಧನವ ಬಿಡಿಸೆಂದು /೨/

ನಶ್ವರದ ಭಿಕ್ಷೆಯದು / ವಿಶ್ವನಾಥನೆ ಬೇಡ /
ವಿಶ್ವ ಪ್ರೇಮಕೆ ಎನ್ನ / ಈಶ್ವರನ ಮಾಡೆಂದು/೩/

ಚಿನ್ಮಯನೇ ನಿನ್ನಾಮ / ದುನ್ಮಾರ್ಗ ದಿಂದೆನ್ನ/
ದುನ್ಮನೋ ವಾಕ್ಕಾಯ/ ತನ್ಮಯವ ಮಾಡೆಂದು /೪/